தமிழ்த்தேனீ - Thamizthenee

2012-01-15T13:05:00.000+05:30

ஒரு கோவிலில் நான் எடுத்த புகைப்படம்

சூரியக்கதிர்கள் விழும் அருமையான காட்சியைப் படம்பிடித்தேன், நான் எதிர்பார்த்ததை விடச் சிறப்பான காட்சியாக அமைந்திருந்தது.

2. 2012ம் ஆண்டு நம் வீட்டில் பொங்கல் திருநாள் கொண்டாட சமைத்த அறுசுவைகூடிய உணவுகளும், சர்க்கரைப் பொங்கலும்

“ பொங்கல் திருநாள் “

“என்நன்றி கொன்றார்க்கும் உய்வுண்டாம்

செய் நன்றி கொன்ற மகற்கு “

உலகில்எத்துணையோ விஞ்ஞானக் கருவிகள்

கண்டுபிடித்துவிட்டோம்

விஞ்ஞானம்அதி விரைவாக வளர்ந்து கொண்டிருக்கிறது

1.உடல்உறுப்புக்களைக் கூட தயாரிக்க ஆரம்பித்துவிட்டோம்

ஆனால்இன்னும் நம்மால் உயிரை தக்கவைத்துக் கொள்ளவோ,

உயிரின்வாழ்நாளை நீட்டித்துக் கொள்ளவோ, முடியவில்லை

2.ஒவ்வொரு மனிதனின் மூளைக்குள்ளும் இருக்கும் மாலிக்யூல்களில் சேகரிக்கப் பட்ட அபூர்வமான சிந்தனைகளைகண்டு பிடிப்புகளை இன்னொரு மூளைக்குள் இடம்மாற்றும் கருவியைக் கண்டு பிடிக்க முடியவில்லை. அதுமட்டும் கண்டு பிடிக்கப்பட்டால் பற்பல அறிஞர்களின் மூளைத்தொகுப்புக்களை வெகு எளிதாக இன்னொரு மூளைக்குள் ஏற்றிவிடலாம்.

இவைஎல்லாம் இருக்கட்டும் இத்துணைக் காலமாய்

நமக்குபல விஞ்ஞான முன்னேற்றங்களை தங்கள் வாழ்வின்

சுவையானபகுதிகளை ஆராய்ச்சி ஆராய்ச்சி என்று கழித்துவிட்டு

தங்கள்வாழ்வை தியாகம் செய்த எத்துணையோ விஞானிகளுக்கும் நாம் நன்றி சொல்லக்கடமைப்பட்டுள்ளோம்

அதைவிட முக்கியமாக நாம் நன்றி சொல்ல வேண்டியவர்கள்

உழவர்கள்,விவசாயிகள்

போகித்திருநாள்:

நம்வீட்டில் சேரும் குப்பை ,அழுக்குகள், இவைகளைக்களைந்து நெருப்பிலிட்டுப் பொசுக்கி,சுற்றுப்புற சூழலை சுத்தமாக்கும் திருநாளே போகி. அன்றுஎரியும் நெருப்பில் நம்முடைய மன அழுக்குகளையும் சேர்த்து எரித்து நம்மையும்தூய்மைப் படுத்திக் கொண்டு மீண்டும்புது வழ்வு துவங்கி மகிழ்ந்து நம்மைப் புதுப்பித்துக் கொள்ளும் நாளே போகி என்னும்திருநாள்.

இன்னும்முக்கியமாக, அன்றாடம் உணவில்லையெனில் உயிர்வாழமுடியாத அத்துணை ஜீவராசிகளின் ஆதார சக்தியான உணவைத்தயாரிக்க விளைவிக்க , தங்களுடைய பொன்னான நேரங்களை உழைப்பை, வியர்வையை நமக்காகசெலவழித்துவிட்டு ,தங்களுக்கென்று ஒன்றும் சேர்த்து வைக்காத விவசாயிகள்இவர்கள் அத்துணை பேரையும் காட்டிலும் உயர்ந்தவர்கள்உத்தமர்கள், நம் உயிரைக் காப்பாற்றும் சக்திகள்,உழவர்கள் ஜாதி ,மதம் ,நாடு, என்னும் எந்தபேதமும் இல்லாத உலகக் காப்பாளர்கள், அமுதசுரபிகள் விவசாயிகளே

அவர்கள்தானியங்கள் விளைவிக்க உதவிய அத்துணை சாதனங்களுக்கும் நன்றி சொல்லும் திருநாளே பொங்கல் திருநாள் ஏர்,கலப்பை, இயற்கை, மாடுகள், எறும்பு,பறவைகள் மண்புழுக்கள்,போன்ற பலருக்கும் நன்றி சொல்லும் விதமாக ஏற்பட்ட திருநாளே பொங்கல் திரு நாள். ஆகவேநன்றி சொல்வோம்

அத்துணைநண்பர்களும் சர்க்கரைபொங்கல்,

வெண் பொங்கல் ,வாழைப்பழம்,கரும்பு இவைகளை உண்ண ஆரம்பிக்கும் போது அவற்றை நமக்குக் கிடைக்கச்செய்த

அந்தஉழவர்களை மனதில் நினைத்து அவர்களுக்கு நன்றி சொல்லிவிட்டு,முடிந்தால் அன்றுஒருநாளாவது ,அவர்களுக்குவேண்டிய உதவிகள் செய்துவிட்டு, உண்போமானால் அதுதான் நாம் செலுத்தும் நன்றி.

அனைத்துதமிழ் நண்பர்களுக்கும் , அனைத்துயிர்க்கும்ஜீவாதாரமான சூரிய பகவானுக்கும்,அனைத்துஉழவர்களுக்கும் நன்றி சொல்ல

மகிழ்ச்சியாய்ப் பொங்கலிடுவோம்

" சூரிய உழவன் " கவிதை

திரு வள்ளுவன் மனதுழுதான்,

மறுவள்ளுவன் வயலுழுகிறான்,

உழுகின்ற நாளெல்லாம் திருநாளே

பரிதியாய் பரிவாய் அவனெழுகின்ற திருநாளே

அவன் வாராத நாளென்றும் வெறு நாளே

கதிரவன் தானேஎழுகிறான் கதிர்களால்உழுகிறான்,

ஏழு வண்ணக் குதிரைகள் தன் தேரில் பூட்டியே

திண்ணமாக வருகிறான் வாழ்வின்இயலுழுகிறான்

தரணியிலே தர்மத்தை பகிர்ந்தளிக்க வருகிறான்

சுற்றுப்பாதை தன்னிலே கட்டுப்பட்டு வருகிறான்

தர்மமென்னும் விதியையே நமக்களிக்கவருகிறான்

பட்டுக் கதிர் சுட்டியே தொட்டு நம்மை அணைக்கவே

தொடர்ந்து மிளிர வைக்கவே, கெட்டவைகள் விலக்கியே

வாழ்வை ஒளிர வைக்கிறான், பட்டு தூய்மையாக்கியே

மனதைக் குளிர வைக்கிறான், கொட்டும் ஒளி அருளியே

சுழன்று கொண்டே வருகிறான்

தொழுதாலும் தவிர்த்தாலும் பொதுவாக அருள்கிறான்

மனிதத்தின் வேருக்கு வலுவாக மிளிர்கிறான்

மண்ணை வளம் செய்ய தரமாக வருகிறான்

முப்போக விளைச்சலுக்கு உரக் கதிராக வருகிறான்

தீமை கண்டு பொங்கியே தீமைகளை அழிக்கவே

போகி போகி போகி என்று தீயிட்டுக் கொளுத்துவோம்

உலகுக்கே பொதுவான தர்மத்தின் சக்கரம்

தாயாக நம்மையே தாங்குகின்ற நற்கரம் நீட்டுகின்ற

நற்கரம் அருளுகின்ற பொற்கரத்தான் தாளை வணங்குவோம்

அவனளித்த அரிசியும், அருமையான வெல்லமும்,

விளைந்து வந்த கரும்பையும், வாழவைத்த வாழையும்

அவனளித்த நெருப்பையே அடுப்பில் அங்கு மூட்டியே

அதன் மீது இருத்தியே ஆக்கும் பொங்கல் பொங்கவே

பாலும் ஊற்றிக் காய்ந்ததும் பொங்கிவரும் வண்ணமாய்

பொங்குகின்ற போதிலே பொங்கலோ பொங்கலென்று

ஓங்கும் குரல் எழுப்பியே ஒளியவனை வணங்குவோம்

பொங்குகின்ற நம் மனதைப் பொங்கலிட்டுப் பதப்படுத்தி

தங்குகின்ற மனிதம் தனைத் தாங்குகின்ற சக்கரம்

நன்மை கொண்டு களிக்கவே, தீமை கண்டு பொங்குவோம்

தீமைகளைக் கழித்துவிட்டு நன்மைதனை வளர்க்கவே

வாழையடி வாழையாய் வந்ததொரு நன்னாளாம்

ஆகாத சோர்வகற்றி ஆன்மாவை வளமாக்கி

புத்தம் புதுமலராய் நித்தம் நித்தம் நம் மனமும்,

மலரும் வண்ணம் ஆரியமோ திராவிடமோ

சாதி மத பேதமின்றி வையமெல்லாம் ஒளிகூட்ட

தவறாமல் மலர்ந்து வரும் தர்மசக்கரம்,

தைமாதத் திருநாளில் விடியும் வேளை

நாமெழுந்து நீராடி நற்காலைப் பொழுதினிலே,

நல் வேளயது தனிலே முத்தான அரிசியுடன்

இனிப்பான வெல்லமதை, அளவோடு நாம் சேர்த்து,

காமதேனு மடிகறந்த அமுதமென்னும் பால் சேர்த்து,

பொங்கி வரும் வேளையிலே, பொங்கலோ பொங்கல்

என்றே நம் வாழ்வும் இன்பமுற இயற்கையின்

தாள் பணிந்தே இறைவன் நாமமது நாம் சொல்லி

நல்லறமும் தருமங்களும், பொங்கலோ பொங்கலென்று

மனமொத்து உரத்துச் சொல்லி,வையகத்து மாந்தரெல்லாம்

வாழ்வாங்கு வாழ்ந்திடவே, பொய்யகற்றி மெய்யுணர்ந்து

பொங்கல் திருநாளில் மங்கலமாய் நாம் களிப்போம்

நல்லேர் உழவர்களும், சொல்லேர் உழவர்களும்

மனமென்னும் பூமிதனை உழுது விளைத்தல் போல்

ப்ரபஞ்ஜத்தை தினம் உழுது, ஞான ஒளி பரப்பும்

இளம்பரிதி இறைவனுக்கே கதிரவனின் காலடியில்

நன்றி சொல்ல ஒரு வாய்ப்பு நாளாய் எண்ணி

நல்வாழ்வு தனை நாடி நன்மைகளைப் பொங்கிடுவோம்

என்மனமார்ந்த நன்றி

அன்புடன்

தமிழ்த்தேனீ-rkc1947@gmail.com

புத்தாண்டு வாழ்த்துக்கள்

2011-12-30T22:28:00.002+05:30

அன்புள்ள நண்பர்களே ,சகோதர சகோதரிகளே,
காலம் ஒரு அருமையான ஆசிரியன், அந்த ஆசிரியன் கற்றுக்கொடுக்கும் பாடங்களை உலகத்தில் வேறு யாராலும் கற்பிக்க முடியாது என்பது திண்ணம் . காலம் ஆட்டிவைக்கிறது, நம்மை தூங்க வைக்கிறது,விழிக்க வைக்கிறது, விழ வைக்கிறது , எழ வைக்கிறது. எல்லாச் செயல்களையும் செய்ய வைக்கிறது, நம்மைப் பண்படுத்துகிறது.
கால ஓட்டம் ,காலச் சுழற்சி கனவேகமாய் சுழன்று கொண்டிருக்கிறது. நிறுத்த முடியாத, மீண்டும் பெறமுடியாத காலங்கள்.அதற்குள் ஒரு வருடம் ஓடிவிட்டது, மறந்து விடாதீர்கள் இப்போதும்,எப்போதும் ஓடிக்கொண்டே இருக்கிறது. ஒவ்வொரு கணமாய்,
இந்த நிமிடத்திலிருந்தாவது ஏற்கெனவே செய்த தவறுகளைக் களைந்து இனி செய்யப்போகும் செயல்களை இன்னும் சிறப்பாய் செய்யப் பழகுவோம். இனிய புத்தாண்டு வாழ்த்துக்கள்.இனி வருங்காலம் இனிதே அமையட்டும். இனிய புத்தாண்டுக் காலம் தொடங்கிவிட்டது இனிமையானதாக நம் வாழ்வை மாற்றிக்கொள்ள நாமும் அதனுடன் ஓடுவோம்.
இனிய புத்தாண்டு வாழ்த்துக்கள்
அன்புடன்
தமிழ்த்தேனீ

2011-10-19T14:52:00.000+05:30

தீபாவளி http://www.vallamai.com/special/deepavali/199
PublishedOctober 18, 2011 |

தமிழ்த்தேனீ

தீபம்’என்றால்ஒளி,விளக்கு.‘ஆவளி’என்றால்வரிசை.வரிசையாய்விளக்கேற்றி,இருள் நீக்கி, ஒளிதரும்பண்டிகையேதீபாவளி ஆகும். தீபத்தில் பரமாத்மாவும்,நெருப்பில்ஜீவாத்மாவும் வாசம்செய்துஅருள்தருவதாகஐதீகம்

. ..தீபாவளித்திருநாளில் விளக்குகளை ஏற்றிஓளியை வழிபட்டுபட்டாசுகளைக்கொளுத்தி அவ்வப்போது உடலிலுள்ள வியாதிகளை நீக்குதல் போல் மனதிலுள்ள தீக்குணங்களாகிய,இருட்டுப் பகுதிகளாகியஅகங்காரம், பொறாமை, தலைக்கனம், போன்ற எதையாவது ஒன்றைஅகற்ற வேண்டும். தீய குணங்களை எரித்துவிட வேண்டும்.இந்துக்கள் திபாவளி கொண்டாடுவதற்கு பல காரணங்களை, புராணக் கதைகளின்வழியாகக் கூறுகின்றனர்.

1.இராமன் பதினான்கு வருடங்கள் வனவாசம்முடித்து, நாடு திரும்பும் போது மக்கள் விளக்கேற்றி வரவேற்றனர்.

2.பகவான் நாராயணனின், ஸ்ரீ தேவி, பூதேவி என்னும் இருமனைவியருள் பூமாதேவிக்குப் பிறந்தநரகாசுரன், தன் அன்னையால்மட்டுமே தனக்கு இறப்பு ஏற்பட வேண்டும் என்று வரம் வாங்கியிருந்தான். அவன் வேண்டுகோளுக்கு இணங்க ஸ்ரீ கிருஷ்ணன், நரகாசுரனை வதம்செய்தபோது, அவன் தான் இறக்கும் தினத்தை மக்கள் கொண்டாட வேண்டும் என்றுகேட்ட வரத்திற்கிணங்க நாம் தீபாவளி என்னும் திருநாளை மகிழ்ச்சியாகக்கொண்டாடுகிறோம்.

3.இராமாயண இதிகாசத்தில், இராமர், இராவணனை அழித்துவிட்டு, தனது வனவாசத்தையும் முடித்து விட்டு, மனைவி சீதையுடனும்சகோதரன் இலட்சுமணனுடனும் அயோத்தி திரும்பிய நாளை,அயோத்தி மக்கள் ஊரெங்கும் விளக்கேற்றிக்கொண்டாடி மகிழ்ந்தனர். இந்நாளே தீபாவளியாகக் கொண்டாடப் படுவதாக கருதப்படுகிறது.

4.கந்த புராணத்தின் படி, சக்தியின் 21 நாள் கேதார விரதம்முடிவுற்ற இத்தினத்தில் தான் சிவன்,சக்தியை தன்னில் ஒரு பாதியாகஏற்றுக்கொண்டு அர்த்தநாரீஸ்வரர் உருவமெடுத்தார். ஆகவே இத்தினத்தைதீபாவளி என்று கொண்டாடுகின்றனர்.

நரகாசுரன்என்பவன் யார் தெரியுமா? பூமித்தாயின் புதல்வன்.லோக மாதா கூட அருள் செய்யாத அளவுக்குப்பாவங்களைப் புரிந்த நரகாசுரனை அழிக்க எண்ணம் கொண்ட பகவான் ஸ்ரீ கிருஷ்ணன் கருடன்மேல் சத்யபாமா சகிதமாக வந்து நரகாசுரன் ஆண்டுவந்த பிராக்ஜோதிச நகரத்தை அடைந்தார். ஆமாம் கூடவே தாயாரையும் பக்கத்தில் வைத்துக்கொண்டு சம்ஹாரம்செய்தது நரகாசுரனைத்தான்.

ஸ்ரீகிருஷ்ணன்போருக்கு ஆயத்தமாக சங்கநாதம் முழங்கினார்.ப்ராக்ஜோதிச நகரத்தின் கோட்டையின்சுவர்களைத் தன் கதாயுதத்தால் தகர்த்து எறிந்தார். முரன் என்னும் அசுரன்சூலமேந்திக் கிருஷ்ணன் மேல் பாய்ந்தான்.அவன் சூலத்தையும் முறித்து அவன்தலையையும் அறுத்தார் கிருஷ்ணன்.பல ஆயுதங்களை கிருஷ்ணன் மேல் பிரயோகித்தநரகாசுரனை அத்துணை ஆயுதங்களையும் தகர்த்து எறிந்து தன்னுடைய சக்ராயுதத்தால்நரகாசுரனை இரண்டாகப் பிளந்து வீழ்த்தினார் கிருஷ்ணபகவான்.

நல்லவர்களுக்கும், முனிவர்களுக்கும்கொடுமைகள் பல புரிந்து அவர்களைத் துன்புறுத்திய நரகாசுரனை, கிருஷ்ணன் வதம் செய்தஇந்த நாளைத் தான் நாம் தீபாவளி என்று கொண்டாடுகிறோம்.

ஆமாம்!அரக்க குணத்தோரை அழித்து நல்ல குணமுள்ளவர்களைக் கொண்டாடும் பண்டிகைதான் தீபாவளி. இந்த நன்நாளில்விடியற்காலையில் எழுந்து கங்காஸ்நானம் செய்து,புத்தாடைகள் அணிந்து, மனதில்மகிழ்ச்சியுடன் இனி வரும் நாளெல்லாம் நமக்கு வாழ்வில் ஓளியேற்றப்போகும் நாட்களேஎன்னும் நல்ல எண்ணத்துடன் இறைவனை நமஸ்காரம் செய்து,பெரியவர்களின் ஆசியோடு நாம் இருளைஅகற்றும் ஒளியை நம் இல்லங்களில் விளக்காய் ஏற்றி,ஒளியை அளிக்கக் கூடிய மத்தாப்பு, புஸ்வாணம், சங்கு சக்கரம், தரைசக்கரம், போன்ற ஓளிகூட்டும்பட்டாசுகளை ஏற்றி மகிழ்ச்சியாகக் கொண்டாடுவோம்.

தீபாவளிஅன்று அனைவரும் பிரும்ம முகூர்த்தமாகிய அதிகாலையில் எழுந்து மணைகள் போட்டு அதில்அனைவரையும் அமரச் செய்து மஞ்சளும் சுண்ணாம்பும் கலந்த கலவையை நலங்காக இட்டுமகிழ்வர். இந்தக் காட்சி கண்கொள்ளாக் காட்சியாகும்.

ஒவ்வொருதம்பதியரும் கணவன் மனைவிக்கும்,மனைவி கணவனுக்கும் நலங்கு இட்டு வெற்றிலையில் சற்றே சுண்ணாம்பும், பாக்கும் வைத்துமெல்லக் கொடுப்பர். நல்லெண்ணெயில் ஓமம் மற்றும் மிளகு போட்டுக் காய்ச்சி தலையில் தடவி விடுவர், அனைவரும் அதன் பிறகு எண்ணெய்க் குளியல் (கங்கா ஸ்நானம் என்னும்குளியல்) செய்வர். அன்றைய தினத்தில் கங்கையில் ஸ்நானம் செய்தால் புண்ணியம்பெருகும் என்பது ஐதீகம். குளித்து முடித்துஅனைவரும் புத்தாடைகள் அணிந்துகொண்டுவிளக்கேற்றி தெய்வங்களை நமஸ்கரித்துவிட்டு,வீட்டிலிருக்கும் பெரியோர்களையும்வணங்கி ஆசி பெறுதல் வழக்கம்.அதன் பிறகு பட்டாசுகள் வெடித்துவிட்டு இனிப்பு பலகாரங்களை உண்டு மகிழ்வதும், நல்ல அறு சுவை உணவு வகைகளைஉண்டு மகிழ்வதும், உறவுக்காரர்களின் வீடுகளுக்கு சென்று உறவுகளை பலப்படுத்திமகிழ்வதும் வழக்கம். ஒருவருக்கொருவர் பரிசுகள் தந்து மகிழ்வர்.

உணவுகளைசெறிமானம் செய்ய, நம் வயிற்றை சுத்தம் செய்யத் தேவையான அத்துணை மூலிகைகளும் கலந்து ’தீபாவளி லேகியம்’என்று ஒரு லேகியம் செய்வர்.

தீபாவளியன்றுநீராடுவதை மட்டும் புனித நீராடல் என்று சொல்வதற்கு காரணம், அன்றைய தினம், அதிகாலையில் எல்லாஇடங்களிலும், தண்ணீரில் கங்கையும்,எண்ணெயில் லட்சுமியும் அரப்பில்சரஸ்வதியும், குங்குமத்தில் கௌரியும்,சந்தனத்தில் பூமாதேவியும், புத்தாடைகளில்மஹாவிஷ்ணுவும் வசிப்பதாக கருதப்படுவதேயாகும்.

அந்தநீராடலைத்தான் “கங்கா ஸ்நானம் ஆச்சா?”என்று ஒருவருக்கொருவர் விசாரிப்பர். அன்றைய தினம், எல்லா நதிகள், ஏரிகள், குளங்கள், கிணறுகளிலும், நீர்நிலைகளும் “கங்கா தேவி” வியாபித்து இருப்பதாக ஐதீகம். அடிப்படையில் இந்துப்பண்டிகையாய் இருந்தாலும், சாதி மத வேறுபாடின்றி அனைவரும் ஒற்றுமையாய் கொண்டாடும் பண்டிகைதீபாவளி.

தீபாவளிஎன்றவுடன் எனக்கு என் காலச் சக்கரம் பின்னோக்கி சுழல ஆரம்பித்துவிட்டது! வருடம் 1958. என் வயது 11. தீபாவளி நன்நாள் மிகவும் சுபிக்க்ஷ்மான காலம், பொற்காலம், காலணாவுக்கு இட்லி, அரை அணாவுக்கு தோசை, 16 அணாக்கள்கொண்டது ஒரு ரூபாய், நாலு காலணாக்கள் கொண்டது ஒரு அணா. மூன்று தம்பிடிகள்கொண்டது காலணா. அந்தக் காலணாவில் முழு நாணயமும் இருக்கும் ஓட்டைக் காலணாவும்இருக்கும்!

ஒருபடி நெல்லூர் பச்சரிசி அதாவது(8 ஆழாக்கு = ஒரு படி) (இப்போது 5ஆழாக்கு ஒரு கிலோ). 100 ரூபாய்சம்பாதிப்பவன் நடுத்தரக் குடும்பஸ்தன்.ஆயிரம் ரூபாய் சம்பாதிப்பவன் பெரும்பணக்காரன்.

சென்னைசென்ட்ரல் ரெயில் நிலையத்தின் பக்கவாட்டில் இருக்கும் வால்டாக்ஸ் தெருவிலே செக்கிலே எண்ணை ஆட்டுவார்கள். அங்கு போய், அப்போது நானும் என்பெரிய சகோதரியும்வாங்கி வருவோம் சுத்தமான நல்லெண்ணை. அதன் பிறகு மளிகைக் கடையிலே அனைத்து மாதாந்திர மளிகைசாமான்களும் வாங்கி மொத்தமாக அனைத்துக்கும் சேர்த்து பதினெட்டு ரூபாய் கொடுப்போம், அவர் எங்களுக்கு இனாமாக (அதைக்கொசுறு என்று சொல்வார்கள்). எங்களுக்கு கையிலே அள்ளிக் கொடுப்பார் மிகப் பெரியவேர்க்கடலைகளை! அதை சாப்பிடவே ஒரு நாள் ஆகும்.

ஒருபெரிய காகிதத்திலே முந்திரி, திராட்சை, பாதாம் பருப்பு,கல்கண்டு என்று ஒரு கதம்பம்கொடுப்பார். இப்போது அதன் விலை குறைந்தது 1000ரூபாய் இருக்கும்! சினிமாவுக்குப் போனால் கட்டணம் ஒரு அணா. அந்தக் காலத்தில்நான் கொண்டாடிய தீபாவளிக்கு என் காலச்சக்கரம் என்னை கொண்டு போய் என் பழையபசுமையான நினைவுகளைக் கிளறி விட்டது.

என்தந்தையார் திரு ஆர். ரங்கஸ்வாமி அவர்கள்.வணிகம் செய்து கொண்டிருந்தார். நாங்கள் சென்னை மத்திய புகைவண்டி நிலையம் அருகில் பீ.ஆர். சதுக்கம் என்னும் இடத்தில் குடியிருந்தோம். அந்த வீட்டுச் சொந்தக்காரர் காஞ்சீபுரத்தில் இருந்தார். அந்த வீட்டில் மொத்தம் 18குடித்தனங்கள்.
மொத்தமாக சிறுவர்களும் சிறுமிகளும் சுமாராக 50 குழந்தைகள். பெண்களுக்குத் தனி மாடி,ஆண்களுக்கு தனி மாடி. மொத்தமாக அனைத்து குழந்தைகளும் ஒன்றாக அவரவர் பெற்றோருடன், மாடிக்கு சென்றுமொத்த வெடிகளையும் வெடிப்பார்கள்.ஆனால் எனக்கு என்றுமே இந்த வெடிகள் மீதுஆசையே கிடையாது. அது வெடிகள் போடும் சப்தத்தினாலா, அல்லது என்னுடையபயத்தினாலா என்று எனக்குத் தெரியாது.என் பங்கு வெடிகளையும் என் அண்ணாவெடிப்பார். நான் தூரத்தில் நின்று வேடிக்கை பார்ப்பது மட்டுமே! ஆனால் அத்தனை குழந்தைகளின் ஆரவாரமும், குதூகலமும், புதுத் துணிகள்சரசரக்க நாங்கள் அடித்த கொட்டமும்,இன்னும் பசுமையாய் மனதிலிருக்கிறது!

என்அப்பா தானாகவே ஒரு மத்தாப்பு செய்வார்.அதைக் காண மொத்தக் கூட்டமும் அங்குகூடிவிடும். ஒரு பெரிய துணியில்,உப்பு,கொஞ்சம் மிளகு, இன்னுமென்னன்னவோசேர்த்து அதைப் பொடி செய்து அந்தத் துணியில் அதை சுற்றி நீளமாக ஒரு கனத்த வால்போல் செய்வார்.

அதன்ஒரு முனையிலே ஒருகயிறு கட்டிவிட்டு மறு முனையிலே நெருப்பை ஏற்றுவார். பிறகுஅந்தக் கயிற்றின் முனையைப் பிடித்துக்கொண்டு விதம் விதமாக சுழற்றுவார்.அதிலிருந்து வரும் மத்தாப்பூ துளிகள்வண்ண வண்ணமாய் மின்னும், பலவித உருவங்களை தோன்றும்!

சமீபத்தில்டிஸ்னீ லேண்ட் அமெரிக்காவில் பார்த்தேன். லேசர் காட்சி என்றார்கள்.மிக நன்றாக இருந்தது! அதை 55 வருடங்களுக்கு முன்னரே நடத்திக் காட்டியவர் என் தந்தை. மிகஆச்சரியமாக இருக்கிறது இப்போது அதை நினைத்தால்!

விடியற்காலையில்எழுப்பி என் அண்ணன், மூத்த சகோதரிகள் இருவர்,என் தம்பி கடைக்குட்டி, அனைவரையும் வரிசையாகஉட்காரவைத்து (தூக்கம் கலையாமல் இருந்தாலும்) எங்கள் கால்களை நீட்டச் சொல்லி இருகால்களிலும் சுண்ணாம்பு, மஞ்சள் கலந்த ஒரு கலவையைப் பூசி,பொட்டு இட்டு, தலையில் நல்ல எண்ணையைஒரு கை வைத்து வெற்றிலை பாக்கு மடித்துக் கொடுத்து (சிறுவர்கள் வெற்றிலை பாக்குபோடக்கூடாது, அன்றுமட்டும் அனுமதி!) அதைச் சாப்பிடச் செய்து நல்ல சுடுதண்ணீரில் எங்களைக் குளிக்க வைத்து பரிவோடு தலையை துணியினால் துடைத்துவிட்டு(இல்லையென்றால் ஜலதோஷம் பிடிக்குமாம்!).புது துணிமணிகள், பழம், வெற்றிலைபாக்கு, பலகாரங்கள், சாமி படத்தின்முன்னால் ஒரு பெரிய தாம்பாளத்தில் வைக்கப் பட்டிருக்கும். அங்கே அழைத்து சாமியைகும்ப்பிட வைத்து, புதுத் துணிகள் எங்களுக்கு அணிவித்து, நாங்கள் அனைவரும்எங்களுடைய பெற்றோரை நெடுஞ்சாண்கிடையாக விழுந்து வணங்குவோம்.

எங்கள்அனைவரின் நலத்துக்காக அவர்களும் இறைவனை வணங்கிவிட்டு இனிப்பு கொடுப்பார்கள்.அவர்கள் கையாலேயேஊட்டிவிடுவார்கள்! அந்த அம்மாவுக்கும்,அப்பாவுக்கும் இனி எங்கே போவேன், அவர்கள் அன்புதன்னலமில்லாதது. அந்தப் பாசம்உண்மையானது! அதை நினைத்துக் கொண்டேஇப்போதும் எங்கள் குழந்தைகளுக்கு செய்து கொண்டிருக்கிறோம் நானும் என் தர்மபத்தினியும். என்னதான் சொல்லுங்கள் அந்தக்கால பாசமும், நேசமும், பரிவும் இப்போது ஒருமாற்று குறைந்துதான் போய்விட்டது.ஹூம் பசுமையான நினைவுகள்!

“பசுமை நிறைந்த நினைவுகளே
பாடித்திரிந்த பறவைகளே
பறந்துசெல்கின்றோம்
நாம்பறந்து செல்கின்றோம்”

என்னும்பாடல்வரிகள் நினைவிற்கு வருகிறது.

காலச்சக்கரம் வெகு வேகமாக சுழல்கிறது.நரகாசுரன் வதமும் அதன் காரணமாகதீபாவளிப் பண்டிகையை இன்று வரை நாம் மகிழ்ச்சியோடு கொண்டாடுவதும், தொடர்ந்து நடந்துகொண்டிருக்கின்றன.
அனைவருக்கும்இனிய தீபாவளி வாழ்த்துக்கள்!

அன்புடன்
தமிழ்த்தேனீ

2011-08-28T14:31:00.001+05:30

“அனுபவமும் தீர்வுகளும் ஆரோக்கியமும்”

”அனுபவம் என்பது ஒவ்வொருவரும் அனுபவித்து தெரிந்து கொள்ளுதலே

அல்லது அடுத்தவர் அனுபவங்களிலிருந்து பாடம் கற்றலே”

என் வாழ்வில் நடந்த ஒரு நிகழ்ச்சியை சொல்கிறேன்:- ஒருமுறை என் தாயாருக்கு தென்னைமரத்து தேள் கொட்டிவிட்டது. நட்டுவாக்களி என்று சொல்வார்கள், அது கொட்டினால் பிழைப்பதரிது. வயது அவருக்கு 60க்குமேல், மருத்துவரிடம் அழைத்துக் கொண்டு சென்று ,ஆங்கில முறைப்படி வைத்தியம் செய்தும் கடைசியில் மருத்துவர் சொன்னார் .உறுதியாக எதுவும் சொல்ல முடியாது, உடல் முழுவதும் விஷம் பரவி இருக்கிறது , பிழைத்தால் அதிசயமென்று .கவலையோடு உட்கார்ந்திருந்தோம் .

வாயிலில் ஒருவர் வந்து பசிக்கிறது ஏதாவது இருந்தால் உண்ணக் கொடுங்கள் என்றார். நானோ கவலையில் இருந்ததால் போய் பிறகு வாருங்கள் என்றேன் உடனே என் தாயார் அப்போதிருந்த நிலையிலும் அப்படிச் சொல்லாதே உள்ளே சென்று அவருக்கு ஏதேனும் உண்ணக் கொடு என்றார்கள்.

நான் வேண்டா வெறுப்பாக ஒரு இலையில் அவருக்கு என் வீட்டில் இருந்ததை அளித்தேன் அவரும் உண்டார், கை கழிவி விட்டு என்னிடம் இந்த அம்மாவுக்கு என்ன ஆயிற்று என்று கேட்டார். நடந்ததை சொன்னேன், அவர் தம்பீ ”ஏழை சொல் அம்பலம் ஏறாது” நான் சொல்வதைக் கேட்கிறாயா என்றார். நானும் சரி என்றேன். அவர் உடனே ஓடிப்போய் படிகாரம் பெரிய கட்டியாய் வாங்கி வா என்றார் .

வாங்கி வந்தேன். பத்து பெரிய பாத்திரங்களில் தண்ணீர் கொண்டு வரச் சொன்னார்,அதையும் கொண்டு வந்தேன் என் தாயாரின் கையில் தேள் கொட்டிய இடத்தில் படிகாரத்தை வைத்து தண்ணீர் ஊற்றிக்கொண்டே கொண்டே இருக்கச் சொன்னார் அரைமணி நேரத்தில் என் தாயாரின் உடலில் நீலம் குறையத் துடங்கியது, என் தாயார் பிழைத்தார்-

மருத்துவரால் கைவிடப்பட்ட என் தாயார் பிழைத்தார்.. அந்த நொடியிலிருந்து என்னைச் சுற்றி நடக்கும் நிகழ்வுகளின் அனுபவங்களைச் சேகரிக்கத் தொடங்கினேன்.

நம் முன்னோர்கள் நிறைய நுணுக்கங்கள் தெரிந்தவராக இருந்தனர் அவர்கள் செய்த ஒரே தவறு நுணுக்கங்களை அடுத்த தலைமுறைக்கு சொல்லாமல் சென்றதுதான். நாமும் நம் பெரியோர்கள் சொன்ன எளிய வைத்திய முறைகளை ஆராய்ந்து பரிசோதனைக்குட்படுத்தி பிறகு நிறைய மருந்துகள் இயற்கையாகவே பக்க விளைவில்லாத மருந்துகள் செய்யலாம் என்பதே என் கருத்து. .

இப்போது என் வாழ்வில் நடந்த சம்பவங்களின் அனுபவத் தொகுப்பை இங்கே அளிக்கிறேன். ஆனால் நான் சித்தர் அல்ல!

1. எங்கள் தெருவில் இருந்த ஒரு வாலிபன் ஓட்டிவந்த ஹீரோ ஹோண்டா திடீரென்று சறுக்கியது கீழே விழுந்து தேய்த்துக்கொண்டே சென்றது, நெற்றியில் காயம் ,ரத்தம் வழிந்தது அந்த வாலிபன் கையால் நெற்றியை அழுத்தியபடி இருந்தார்.

அதைக் கண்ட நான் எதிரே இருந்த வெற்றிலைபாக்கு கடைக்கு சென்று தீக்ககுச்சியை உரசி கைக்குட்டையின் ஒரு ஓரத்தை பற்றவைத்து கரியாக்கி, அதில் கொஞ்சம் வெல்லம், சுண்ணாம்பு இரண்டையும் கலந்து உள்ளங்கையில் வைத்து நன்றாக சூடு பறக்க தேய்த்துக் குழைத்து நெற்றியிலிட்டேன், ரத்தம் வருவது நின்றது, ரெண்டு நாளைக்கு தண்ணி படாமே பாத்துக்கோங்க என்றேன் , இரண்டே நாளில் அந்தப் பற்று உதிர்ந்தது, காயமும் ஆறியது, அது மட்டுமல்ல காயம் பட்ட வடுவும் குறுகிய நாட்களிலே மறைந்தது.

2. நாங்கள் ப்ரயாணம் செய்த அந்த குளிர்சாதன பேருந்தில் ஒருவர் இருமிக்கொண்டே வந்தார். பேருந்து ஓரிடத்தில் நின்றது, யாரெல்லாம் காப்பி சாப்படறீங்களோ சாப்டுட்டு சீக்கிறம் வாங்க என்றார் ஓட்டுனர். ஒரு மளிகைக் கடையில் கொஞ்சம் சீரகம் வாங்கிக்கொண்டு பேருந்தில் ஏறி இருமிக்கொண்டிருந்தாரே அவரிடம் கொடுத்து வாயிலே அடக்கிக்கோங்க, அப்பிடியே கடிச்சி அந்த சாற்றை மட்டும் முழுங்குங்க என்றேன். சென்னை வந்து சேரும் வரையில் இருமல் சத்தம் கேட்கவே இல்லை. சென்னைக்கு வந்து இறங்கும்போது அந்த இருமல்காரர் என்னிடம் வந்து சார் நீங்க சொன்ன மருந்து அமிர்தம் சார்,உடனே என் இருமல் நின்னு போச்சு என்றார் .

3. வில்லிவாக்கத்திலே இருக்கும்போது எங்கள் பக்கத்து குடித்தனக்காரரின் குழந்தை அழுது கொண்டே இருந்தது. அழுகையை நிறுத்தவே இல்லை. அந்தக் குழந்தையை வாங்கி அதன் காதை தொட்டேன், வீறிட்டு அலறியது. ஒரு தடிமனான படுக்கை விரிப்பை எடுத்து அதில் அந்தக் குழந்தையை நடுவிலே விட்டு விட்டு அந்த படுக்கை விரிப்பின் ஒரு பக்க இரு முனைகளையும் கெட்டியாக ஒருவரைப் பிடிக்கச் சொல்லி மரு பக்கத்தின் இரு முனைகளையும் நான் பிடித்துக்கொண்டு மூன்று முறை குழந்தையை இரு ஓரத்துக்கும் உருளுவது போல படுக்கை விரிப்பை தாழ்த்தியும் ,உயர்த்தியும் செய்தேன்.

குழந்தை அழுகையை நிறுத்தி விட்டு சிரித்தது, ஆமாம் குழந்தைக்கு உரம் விழுதல் என்று ஒன்று உண்டு, அப்படி உரம் விழுந்தால் அதைக் கண்டு பிடிக்க காதைத் தொட்டால் போதும் ,குழந்தை இன்னமும் அதிகமாக வீறிடும்,அப்படிக் கண்டு பிடித்தால் இப்படி படுக்கை விரிப்பை உபயோகித்து செய்தால் குழந்தைக்கு உரம் விழுந்திருப்பது நீங்கும்.

4. ஒரு முறை என் நண்பர் உணவு விடுதியில் அவருக்குப் பிடித்தமான பிரியாணியை ஒரு வெட்டு வெட்டிவிட்டு செரிமானம் ஆகாமல் அவதிப்பட்டார். அவரிடம் கொஞ்சம் புளி, கொஞ்சம் சீரகம் இரண்டையும் கலந்து வாயில் போட்டு மெல்லும்படி சொன்னேன் சில நிமிடங்களில் அவர் அஜீரணத்திலிருந்து விடுதலை பெற்றார்

5. ஒரு பெண்மணி திடீரென்று ஏதோ பூச்சி கடித்துவிட்டது அதனால் உடம்பெல்லாம் தடிமனாக ஆங்காங்கே வீங்கிவிட்டது என்றார். அவருக்கு ஒரு மலைவாழைப் பழத்தின் உள்ளே பெருங்காயம் வைத்து உண்ணச் சொன்னேன். சில மணித்துளிகளில் அவருடைய வீக்கங்கள் வடிந்தன.

6. சில நேரங்களில் குழந்தைகள் எதற்காக அழுகிறது என்றே தெரியாமல் அழுது கொண்டே இருக்கும், எதையோ பார்த்து பயந்தது போல் மிரண்டு மிரண்டு அழும்.அப்படிப்பட்ட நேரங்களில் கொஞ்சம் திரு நீற்றை எடுத்து மன சுத்தியுடன், “ஓம் ஹரீம் ஸ்ரீம் க்லீம் ஜம் மனசா தேவ்யை நமஹ: ” என்னும் ஸ்லோகத்தை ஜரத்காரு தேவியியை நினைத்து ஜபித்துவிட்டு குழந்தையின் நெற்றியில் பூசினால் உடனே குழந்தை அழுகையை நிறுத்தும். அல்லது வயிற்று வலியால் அழுதால் ஒரு வெற்றிலையில் கொஞ்சம் விளக்கெண்ணெய் தடவி அதை அடுப்பிலே காட்டி இளஞ்சூடாக வயிற்றில் போட்டு போட்டு எடுத்தால் வயிற்று வலி நீங்கி புன்னகை பூக்கும் குழந்தை.

7. முகத்திலோ மற்ற ஏதேனும் உடல் அவயவங்களில் காயம் ஏற்பட்டு அந்தக் காயத்தின் விளைவாக கரும் வடு ஏற்பட்டால் மஞ்சளையும் தேங்காய் எண்ணையையும் கலந்து பூசி வந்தால் அந்த கரும் வடு மறைந்து மீண்டும் சருமம் பளிச்சிடும்.

8. பொதுவாக மாம்பழக் காலங்களில் மாம்பழம் சாப்பிட்டதன் விளைவாக வரும் வயிற்றுப் போக்கை நிறுத்த அந்த மாம்பழத்தின் கொட்டையில் இருக்கும் மாம்பருப்பை எடுத்து அடுப்பிலே சுட்டு அந்தப் பருப்பை உண்டால் வயிற்றுப் போக்கு நிற்கும்.

9. நம் உடல் உஷ்ணத்தினால் பாதிக்கப்பட்டு வரும் வயிற்று வலியை நீக்க ஒரு கைப்பிடி வெந்தயத்தை எடுத்துக்கொண்டு அதை அப்பிடியே வாயில் போட்டு கடிக்காமல் முழுங்கி விட்டு அதை முழுங்க உதவியாக ஒரு டம்ளர் மோரை குடித்தால் உஷ்ணம் குறைந்து உடனே வயிற்று வலி நிற்கும்.

10. ப்ரயாண காலங்களில் வெய்யிலில் ப்ரயாணம் செய்யும்போது வெய்யிலின் பாதிப்பு இல்லாமல் இருக்க எலுமிச்சம் பழத்தை வைத்துக்கொண்டு அவ்வப்போது அதைப் பிழிந்து சாறு எடுத்து அதனுடன் சர்க்கரையை,அல்லது சிறிதளவு உப்பை கலந்து நீரும் கலந்து குடித்துக்கொண்டே இருந்தால் ப்ரயாணக் களைப்பும் தீரும், உடல் சூடும் சமனப்படும்

11. குளிர் ப்ரதேசங்களில் பயணப்படும்போது சற்றே இஞ்சி கலந்த சீரகத்தையும் , சில மிளகுகளையும் கலந்து இடித்து வைத்துக்கொண்டால் அதனுடன் வெல்லம் கலந்தோ,அல்லது சர்க்கரை கலந்தோ பானம் தயாரித்து குடித்தால் குளிர் நிற்கும்.

12.ஜலதோஷத்தினாலோ,அல்லது தொண்டைப் புண் ஏற்பட்டு தொண்டைக் கரகரப்பு ஏற்பட்டால் கொஞ்சம் சுண்ணாம்பை தேங்காய் என்ணையுடன் கலந்து தொண்டைப் பகுதியில் தடவினால் விரைவில் குணமாகும்.

13. ஒரு முறை நாங்கள் குடியிருந்த வீட்டில் இரவில் நல்ல தூக்கத்தில் விரலில் ஏதோ கடித்ததைப் போன்ற உணர்வு, சிறிது நேரத்தில் கடுக்கத் தொடங்கியது, தூக்கம் கலைந்து விளக்கை எரியவிட்டுப் பார்த்தேன், கொசு வலையின் ஓரத்திலே சாதுவாக உட்கார்ந்திருந்தது ஒரு தேள்.

அந்த வலியையும் பொறுத்துக்கொண்டு சமையலறைக்கு சென்று கிடுக்கியை எடுத்து வந்து அந்தத் தேளை கிடுக்கியால் பிடித்து அடித்துப் போட்டுவிட்டு அந்தத் தேள் கொட்டிய விரலைப் பார்த்தேன்,அந்தத் தேள் கொட்டிய கொட்டுவாயில் இருந்த தேளின் கொடுக்கு முனையை ஒரு ஊசியால் நீக்கிவிட்டு சமையலறைக்கு சென்று ஒரு வெங்காயம், சிறிது பெருங்காயம், இரண்டையும் அரைத்து அந்தக் கொட்டுவாயில் தடவிக் கொண்டு ஒரு மெழுகு வர்த்தியை ஏற்றி அந்தக் கொட்டு வாயை சூடு படுவது போல் பலமுறைகள் காட்டி பிறகு கையின் மேற்புறத்தில் ஒரு துணியை இறுக்கிக் கட்டிக்கொண்டு படுத்தேன் . சிறிது நேரத்தில் தேள்கடியின் வீரியம் குறைந்து கடுப்பு நின்றது,தூங்க ஆரம்பித்தேன் மறுநாள் வலி போயே போச், வலி போயிந்தி

14. மார்பில் கபம் கட்டிக்கொண்டு மூச்சு விடமுடியாமல் அவதிப்படும்போது நான்கைந்து வெற்றிலைகளை எடுத்து அவற்றை லேசாக சூடு காட்டி எலுமிச்சை பிழியும் கருவியில் போட்டு நசுக்கி சாறு பிழிந்து,அத்துடன் ஓரிரு மிளகையும் பொடி செய்து சிறிது தேனையும் கலந்து குடித்தால் கபம் பறந்துவிடும், மூச்சு சீராக விடமுடியும்.

15. தூது வளை இலை கிடைத்தால் அதைப் பொடியாக செய்து வைத்துக்கொள்ளுங்கள் . அந்தப் பொடியுடன் சற்றே பொடி உப்பு ,அல்லது தேன், அல்லது சர்க்கரை கலந்து மூன்று வேளை சாப்பிட்டாலே மார்புச் சளி கரைந்து சுவாசம் சீராகும்.

16. மிளகு, சீரகம் சற்றே வறுத்து அதைப் பொடி செய்து சுடச்சுட சாதம் போட்டுக்கொண்டு அந்தப் பொடியை அந்த சாதத்தின் மேல் அப்படியே போட்டு, நெய் காய்ச்சி சுடச்சுட அதன் மேல் ஊற்றி தேவையான் உப்பு போட்டு கலந்து சாப்பிட்டால் அன்னத்வேஷம் அகலும், உணவு உண்ண ஆர்வம் வரும்.

17. ஒரு நல்ல வாழை இலையை நன்றாகக் கழுவி அந்த வாழை இலையில் ஆங்காங்கே ஒரு கரண்டி சூடான சாதத்தைப் போட்டு,சற்று நேரம் வைத்திருங்கள், அந்த சாதத்தை எடுத்துப் பார்த்தால், அந்த சாதம் இருந்த இடங்கள் பசுமை நிறம் மாறி இருக்கும். அந்த சாதங்கள் வாழை இலையிலுள்ள சத்தை உரிஞ்சிக்கொண்டது என்று பொருள். அந்த சாதத்தை உங்கள் விருப்பப்படி எதில்வேண்டுமானாலும் கலந்து உண்ணுங்கள் இது போல் வாரம் ஒரு முறை செய்யுங்கள், உங்கள் ரத்தத்தில் இருக்கும் அத்துணை விஷப்பொருட்களும் நீங்கும் இதனால்தான் நம் முன்னோர் வாழை இலையில் உணவு உண்ணும் முறையை வைத்திருந்தனர்

18. குழந்தைக்கு அடிக்கடி ஜுரம் வந்தால், வயிறு உப்புசமாக ஆனால், அதை மாந்தம் என்று சொல்வார்கள் அந்தக் குழந்தையின் வயிற்றில் அடிக்கடி வெற்றிலையில் விளக்கெண்ணெய் தடவி சூடாக்கி போடுங்கள்,மாந்தம் நீங்கும்.

19. சில குழந்தைகள் பிறக்கும் போதே குளிர்ச்சி அதிகம் தாக்கியதாலும் , அல்லது குறைமாதப் ப்ரசவம் என்றாலும் உடலில் நீலம் காணப்படும், மிகவும் இளைத்து பலகீனமாக காணப்படும், அது போன்ற குழந்தைகளுக்கு மாதம் ஒரு முறையாவது கழுதைப் பால் அளித்தால் அந்த நீலமும் மறையும், குழந்தையும் வலுப்படும்.

20. மாமரத்தில் இலைகள் துளிர் விட்டிருப்பதைப் பார்த்திருப்பீர்கள், என்றாவது அந்த துளிர் இலைகளை சாப்பிட்டுப் பார்த்திருக்கிறீர்களா? அது போன்ற துளிர் இலைகளை பறித்து, அத்துடன் சற்றே மிளகாய், புளி, இவற்றை அரைத்து சுவையான துவையல் செய்து உண்ணுங்கள். ரத்தம் சுத்தியாகும், நன்றாகப் பசி எடுக்கும்.

21. வாழைப் பூவில் இருக்கும் சிறு சிறு பூக்களை அரிந்து துவரம் பருப்பை அரைத்து வேகவைத்து கலந்து வாழைப்பூ பருப்பு உசிலி என்று செய்வார்கள்,இது உடலுக்கு மிகவும் நல்லது இதில் இன்னமும் விசேஷமான செய்தி என்னவென்றால் இந்தப் பூவை கடைசீ வரையில் ஆய்ந்து சிறும் பூக்களை தனிதனியாகப் பிரித்து அந்தப் பூக்களில் இருக்கும் மொட்டு போன்ற பகுதியை கள்ளன் என்று சொல்லி ஆய்ந்து விடுவார்கள்,அதன் பிறகுதான் சமைப்பார்கள்.கடைசீயாக இருக்கும் பகுதியில் உள்ளே அந்த வாழைப்பூவின் சிறு பகுதி வாழைப்பூ போலவே உருவத்தில் சிறுத்து இருக்கும் வெள்ளையாக, அந்த பகுதியை உண்டால் தேங்காய் சாப்பிடுவது போல் ருசி இருக்கும். முக்கியமாக இந்தப் பகுதி வயிற்றுப் புண், போன்றவைகளை ஆற்றும் தன்மை கொண்டது -

22. பலாப்பழம் போன்ற இனிப்பான பழத்தை அதிகம் விரும்புவோர் கவனிக்கவும் : பலாப்பழத்தை சாப்பிட்டால் சிலருக்கு ஒவ்வாமை ஏற்பட்டு வயிறு கெட்டுப்போய் அவதிப்படுபவர்களுக்கு முக்கியமான மருந்து ஒன்று உண்டு, அது என்ன தெரியுமா? அந்தப் பலாப்பழத்தின் உள்ளே இருக்கும் பலாக் கொட்டைதான் மருந்து! ஆமாம் இது இறைவனின் இயற்கை விந்தை! அந்தப் பலாப்பழக் கொட்டையை அடுப்பில் வேக வைத்து தேனில் குழைத்து உண்டால் பலாப்பழத்தினால் வந்த ஒவ்வாமை நீங்கிவிடும்.

23. வாழைப்பழத்தை உரித்து அதன் சதைப்பகுதியை சற்றே நெய் போட்டு பிசைந்து அந்தக் கலவையை உண்டால் வயிறு உப்புசம், மந்தம் போன்றவை அடியோடு விலகும்.

24. வரட்டு இருமல் என்று சொல்வார்களே அதுபோல் மிதமிஞ்சிய குளிராலோ,அல்லது அதிக வெப்பத்தினாலோ ஏற்படும் வரட்டு இருமலைப் போக்க நாட்டு மருந்துக் கடைகளில் கிடைக்கும் ” அதி மதுரம் “ சிறு மரக் பட்டைகள் போல் இருக்கும். அதை வாயில் அடக்கிக்கொண்டு அதன் சாற்றை விழுங்கிக் கொண்டே இருந்தால் நின்றுவிடும் வரட்டு இருமல்.

25. அடாத ஜலதோஷமா? தேங்காய் எண்ணையில் சிறிது பூங்கற்பூரம் போட்டுக் காய்ச்சி அதை மார்பில் தடவுங்கள். ஜலதோஷம் குறையும், மூச்சு விட எளிதாக இருக்கும்

26. உடலில் சிறங்கு, சொறி,தேமல் போன்றவை இருந்தால் சீய்க்காய்ப் பொடி போட்டு நன்றாக தேய்த்துக் குளித்துவிட்டு மஞ்சளையும் தேங்காய் எண்ணையையும் கலந்து பூசுங்கள். சீக்கிரமே அவை காணாமல் போகும், அப்படியும் போகவில்லையென்றால் உத்தாமணி (ப்ரியாமணி அல்ல) என்னும் வேலிப் பருத்தி இலையின் பாலை தடவி வந்தால் நிரந்தரமாக நோய் தீரும்.

27. சாதாரண ஜலதோஷத்துக்கு நல்ல வரளி மஞ்சளை எடுத்து நெருப்பில் தீய்த்து அதன் மணத்தை முகருங்கள். ஜலதோஷம் சொல்லாமல் கொள்ளாமல் ஓடிப்போகும்

28. நீண்ட நாட்கள் படுக்கையில் இருந்தால் படுக்கைப் புண் உண்டாகும் அப்படி படுக்கைப் புண் வராமல் இருக்கவும் ,அப்படி வந்துவிட்டால் விரைவில் குணமாகவும் சுத்தமான துணியினால் துடைத்துவிட்டு கற்பூரத்தையும் ஆலிவ் எண்ணையையும் கலந்து பூசுங்கள்.

29. என்னதான் பல் தேய்த்தாலும் வாய் நாற்றம் வருகிறதா? ஆலம் விழுதுகளை பொடி செய்து, கடுக்காய் பொடி செய்து,வேப்பம் பட்டையை பொடி செய்து மூன்றையும் கலந்து வைத்துக்கொண்டு ஒரு வாரம் பல் துலக்குங்கள் வாய் துர்நாற்றம் அண்டாது.

30. ஒரு நற் செய்தி: கற்பூரம் அதிக அளவில் சாராயம் தயாரிக்கப்படும்போது கலக்கப்படுகிறது, நாம் உபயோகிக்கும் பல ரசாயனங்களில் கலக்கப்படுகிறது,அப்படி கற்பூரத்தினால் ஒவ்வாமை வந்தால் பித்தம் அதிகமாகும் , தலை சுற்றல் ஏற்படும். அப்படிப்பட்ட நேரங்களில் ஒரு காப்பி குடித்தால் சரியாகிவிடும் தலை சுற்றல்.

31. அன்றாடம் நாம் பல் துலக்கும் வழக்கத்தை ஏற்படுத்தித் தந்த முன்னோர்களுக்கு நன்றி சொல்வோம். தூங்கி எழுந்தவுடன் பல்லை நன்றாக நம் விரல்களால் உள்ளும் புறமும் பிடித்து அழுத்தி துலக்குங்கள். நன்றாக உணரலாம் தூக்கக் கலக்கம் தெளிவதை,, ஏனென்றால் நம் பற்களுக்கும் நம் மூளைக்கும் தொடர்பு உண்டு. நம் பற்கள் அழுத்தப்படுவதால் மூளை சுறுசுறுப்படைகிறது. அதன் பிறகு இருக்கவே இருக்கிறது பல் துலக்கும் ப்ரஷ் . அதனால்தான் பல் பிடுங்கும் போது அதன் வேர்கள் பாதிக்கப்படாமல் இருக்குமாறு பிடுங்குவார்கள், அப்படி வேர்களில் பாதிப்பு ஏற்பட்டால் மூளை பாதிப்படையும் .

32. சொத்தைப் பற்கள் இருந்து ஆரம்பத்திலேயே அவை கண்டு பிடிக்கப்பட்டால் மிகவும் நல்ல மருந்து ஒன்று உண்டு ஆமாம், கிராம்பு எனும் லவங்கம்.அல்லது கிராம்புத் தைலம் கலப்படமில்லாதது, அதை அந்த சொத்தைப் பற்களில் வைத்து அழுத்திக் கடித்து சிறிது நேரம் வைத்திருந்துவிட்டு வாய் கொப்பளித்தால் சொத்தை தானாக மறையும் .இல்லையென்றால் பல் வைத்தியர் நம் பல் சொத்தையைப் பிடுங்க ,நம் சொத்தையே பிடுங்கிக்கொள்வர்.

33. கண்ணில் வரும் கண் நோய், கண் சிவப்பு, போன்றவைகளுக்கு மிகவும் சிறந்த மருந்து தாய்ப்பால். ஆனால் இது எல்லோருக்கும் எப்போதும் கிடைக்காது, ஆகையால் அதற்கு ஈடான மருந்தே இல்லையென்றாலும் சுத்தமான பன்னீரை உபயோகித்தால் ஓரளவு பலன் கிடைக்கும்.

34. அடிக்கடி காய்ச்சல் வரும் குழந்தைகளுக்கு நாட்டு மருந்துக் கடைகளில் கிடைக்கும் நிலவேம்பு என்னும் வேரை வாங்கி வந்து அதை கொதி நீரில் போட்டு சுண்டக் காய்ச்சி அந்தக் கஷாயத்தை தேனில் கலந்து கொடுத்தால் எப்படிப்பட்ட காய்ச்சலும் குணமாகும்.

35. வயிற்றுப் புண் பல விதமான காரணங்களால் வரலாம், அதிக காரம் உண்பவர்கள், அதிகாரம் செய்ய தைரியமில்லாததால் சோம பானம் சுறாபானம் போன்றவற்றைக் குடித்துவிட்டு தைரியம் வரவழைத்துக்கொண்டு அதிகாரம் செய்பவர்கள், அடுத்தவர் வாழும் வாழ்க்கையைப் பார்த்து வயிற்றெரிச்சல் படுபவர்கள் போன்றோருக்கு உண்டாகும் வயிற்றுப் புண், குணமாக நல்ல பச்சை சுண்டைக் காயை வாங்கி வந்து வதக்கி உண்ணலாம், அல்லது காய்ந்த சுண்டைக்காயை வாங்கி வறுத்து பொடி செய்து சாதத்தில் போட்டுக்கொண்டு சற்றே உப்பும் போட்டுக்கொண்டு நெய்யை ஊற்றி கலந்து உண்ணலாம், வயிற்றுப் புண், வயிற்றெரிச்சல் காணாமல் போகும் .

36. பாம்புக்கடி பட்டவர்க்கு உடனடி விஷ முறிவு வைத்தியம் , வாழைப் பட்டையில் படுக்க வைத்து அவரைத் தூங்கவிடாமல் பார்த்துக்கொள்வது, மற்றும் அவருக்கு வாய் மூலமாக வழைப்பட்டைச் சாற்றினை ஊட்டுவது. வாழைப்பட்டைச் சாறுக்கு அவ்வளவு விஷ முறிவு சக்தி உண்டு.

37. சில குழந்தைகள் உடம்பு எப்போதும் சூடாக இருக்கும், கணச் சூடு என்பர். இப்படிப்பட்ட குழந்தைகள் மெலிந்தே இருப்பர். இதுவும் ஒரு வகை நோய்தான், இந்த நோயை அகற்றி ஆரோக்கியமான குழந்தையாக மாற்ற, ஓரிரு முறை கழுதைப் பாலை கொடுத்துவிட்டு, அதன் பிறகு ஆட்டுப் பால் வாரம் ஒரு முறை கொடுத்து வந்தால் குழந்தை நன்றாக வளரும், இதற்குதான் ”அழுத பிள்ளை சிரிச்சுதான் கழுதைப் பாலைக் குடிச்சுதான்” என்பர் பெரியோர். –

38. அகத்திக் கீரை, கீழா நெல்லி, ஆலம் விழுதின் துளிர், முருங்கைக் கீரை, போன்றவை மிகவும் அருமையான ஔடதங்கள். இவைகளை நாள் ஒரு கீரை வீதம் அரைத்து வேகவைத்து பாலுடன் கலந்து பருகிவர , கர்ப்பிணிப் பெண்களுக்கு குழந்தை பிறந்தவுடன் சுரக்கும் அமிருதமாகிய தாய்ப்பால் அதிக அளவில் சுரக்க, ப்ரசவம் ஆன சில நாட்களிலேயே நம் முன்னோர்கள் இவைகளை வேகவைத்து உணவுடன் சேர்த்தும் கொடுப்பார்கள்,

39. முருங்கைக் கீரை போல ஒரு அரு மருந்து கிடையவே கிடையாது! நம்முடைய ரத்தக் கொதிப்புக்கு ,அதாவது அதிக உணர்ச்சி வயப்பட்டு உடலும் மனமும் பரபரக்கும் வேளைகளில் நம்முடைய ரத்த ஓட்டத்தை சீராக வைக்க தினமும் முருங்கைக் கீரைச் சாற்றை ஒரு அவுன்ஸ் வீதம் பருகினால் ரத்தக் கொதிப்பு நோய் முற்றிலும் சீராகும்.

40. ரத்த ஓட்டத்தை சீராக வைக்கவும் ,பக்கவாதம் போன்ற நோய்களைக் குணப்படுத்தவும் பச்சை வெங்காயம் போன்ற சஞ்சீவினி உலகத்திலேயே இல்லை எனலாம். அப்படிப்பட்ட வெங்காயத்தை தினமும் பச்சையாக உண்டு வருவதால் பலவிதமான நோய்களை ஆரம்பத்திலேயே கட்டுப்படுத்தலாம். ஆனால் வெங்காயத்தை நறுக்கி வைத்துவிட்டு வெகு நேரம் கழித்து உண்டால் வியாதிகள் பரவும் அபாயம் உண்டு.ஏனென்றால் வெங்காயத்துக்கு கிருமிகளை வசீகரிக்கும் குணம் உண்டு. ஆகவே வெங்காயத்தை நறுக்கி உடனடியாக உண்ணவேண்டும்.

41. பச்சைப் பட்டாணியை தொடர்ந்து உபயோகித்து வந்தால் இதய சம்பந்தமான நோய்கள் தடுக்கப்படும், இதயத்திலிருந்துஎல்லாஉறுப்புகளுக்கும் ப்ரயாணம் செய்யும் ரத்தக் குழாய்களில் அடைப்பு ஏற்படாமல் தடுக்க எப்போதும் பச்சைப் பட்டாணிகளை உபயோகிக்க வேண்டும். –

43. நாட்டு மருந்துக் கடைகளில் கிடைக்கும் சித்தரத்தை, கருஞ்சீரகம்,நிலவேம்பு போன்றவைகளை வாங்கி பொடி செய்து வைத்துக்கொண்டால் அந்தப் பொடியை தேனுடன் கலந்து உண்ண எப்படிப்பட்ட வாதமும் , காய்ச்சலும்,கபமும் தீரும்.

44. வெற்றிலை போடும் பழக்கம் இல்லாத பெண்மணிகளைக் கூட பெரியவர்கள் ப்ரசவம் ஆன கையோடு வெற்றிலை பாக்கு சுண்ணாம்பு மூன்றையும் சரியான விகிதத்தில் உண்ணச் செய்வர்,இந்த வெற்றிலை ,பாக்கு சுண்ணாம்பு மூன்றின் கலவையை மென்று சுவைப்பதால் நம் வாயில் சுரக்கும் உமிழ்நீரும் சேர்ந்து வயிற்றினுள் செல்லும்போது ஜீரண சக்தியையும், அளிக்கிறது

45. நல்ல சீரகத்தை கொஞ்சம் எடுத்து நல்லெண்ணையில் போட்டு காய்ச்சுங்கள், அந்த சீரகங்கள் நன்கு பொரிந்து உடையும் பக்குவத்தில் வரும்போது தரமான சாம்பிராணி அதில் சேர்த்து அந்த எண்ணெய் ஆறியவுடன் அதை வடிகட்டி மாதம் ஒரு முறை தலைக்கு தேய்த்து எண்ணெய்க் குளியல் போட்டால் பித்தத்தினால் வரும் கண்ணோய்கள், வாந்தி மயக்கம் அனைத்தும் தீரும்

46. ”போன கண்ணைக் கொடுக்கும் பொன்னாங்கண்ணி ” என்று ஒரு சொல்வழக்கு உண்டு. அது பொய்யல்ல! பொன்னாங்கண்ணிக் கீரையை ஆய்ந்து காயவைத்து அதை நல்லெண்ணையில் போட்டுக் காய்ச்சி மாதம் ஒரு முறை எண்ணெய்க் குளியல் போடும் வழக்கம் கண்களைக் குளிர்ச்சியாகவும் வைத்திருக்கும் , பார்வை தீட்ஷண்யத்தை அதிகரிக்க வழியும் செய்யும்.

47. வல்லாரை என்றொரு கீரை உண்டு கீரை விற்பவர்களிடம் சொன்னால் கொண்டு வந்து தருவார்கள். அந்த வல்லாரைக் கீரையை அவ்வப்போது வதக்கி உணவில் சேர்த்துக்கொண்டால் ஞாபக சக்தி அதிகரிக்கும்.

48. துளசியைப் போல் ஒரு தூய மூலிகை உண்டோ? அதனால்தானே ஸ்ரீமன் நாராயணனுக்கு துளசியால் அர்ச்சனையும், ஆஞ்சநேயருக்கு துளசி மாலையும், அணிவிக்கிறோம். அதனால்தானே ஆண்டாளும் துளசி மாடத்தின் கீழே இருந்தாள். அப்பேற்பட்ட துளசியை சாதாரணமாக ஓரிரு இலைகள் உண்டு வந்தாலே மார்ச்சளி கரையும், கபம் நீங்கும்,ரத்தம் சுத்தியாகும். துளசியை நன்கு அரைத்து அதை வடிகட்டி அதில் சிறிதளவு தேனைக் கலந்து குழந்தைகளுக்கு கொடுத்துவாருங்கள், வேண்டாத காய்ச்சலும், இருமலும் வராமலே போகும்

49. அமுக்கனாங்கிழங்கு என்றொரு வகை உண்டு, அந்தக் கிழங்கை வேகவைத்து உண்டு வர ரத்த சோகை, இரும்புச் சத்துக் குறைவு போன்றவை நீங்கும், இளம் தம்பதியருக்கு இந்த அமுக்கனாங்கிழங்கு சூரணம் மிகவும் பயன் அளிக்க வல்லது,

50. காய்ச்சல் காரணமாகவோ , அஜீரணம் காரணமாகவோ உணவு பிடிக்காமல் போகும் போது அந்த உணவு பிடிக்காமை தீர்ந்து உணவு உண்ண ஆர்வம் அதிகரிக்க உடனடியான மருத்துவம் ஒன்று உண்டு கருவேப்பிலை, கொத்துமல்லி, சற்றே மிளகு, புளி, தேவையான உப்பு சேர்த்து அரைத்து சுடும் சாதத்தில் அதைப் போட்டு நல்லெண்ணெய் ஊற்றிப் பிசைந்து ஒரு வாய் உண்ணுங்கள். அதன் பிறகு விருந்தே உண்ணலாம் போல் ஆர்வம் வரும்.

51. நாட்டு மருந்துக் கடையில் சென்று ” விஷ்ணுக் கரந்தை “ என்று கேட்டு வாங்கி அதைப் பொடி செய்து மூன்று சிட்டிகை ஒரு அவுன்ஸ் மாதுளம்பழச் சாறுடன் கலந்து பருகி வர கருப்பைக் கோளாறுகள் நீங்கி கருத்தரித்து மழலைச் செல்வத்தைக் கொஞ்சி மகிழும் பாக்கியம் கிடைக்கும்

”உணவு மட்டும் மருந்தல்ல நம் அனுபவமும் நல்ல மருந்துதான்”

அன்புடன்

தமிழ்த்தேனீ

2011-08-27T20:45:00.003+05:30

“ உணவும் ஆரோக்கியமும் “

உணவே மருந்து, மருந்தே உணவு, "மிகினும் குறையினும் நோய்செய்யும்." ”உணவு இடைவேளை ”என்பது ஒரு முறை உண்பதற்கும் அடுத்த முறை உண்பதற்கும் உள்ள இடைவேளை நேரக் கணக்குதான். குறைந்த அளவு ஐந்து மணி நேரத்துக்கு இடைவேளை விடுவது நல்லது.

காலை எழுந்தவுடன் காலை சிற்றுண்டியை முடித்துவிட்டு ஐந்து மணி நேரம் இடைவேலைவிட்டு மதிய உணவை உண்பது ஆரோக்கியமாகும். காலையில் சிற்றுண்டி ,மதியம் வயிறு நிறைய உணவு இரவு எளிதில் ஜீரணம் ஆகக்கூடிய பழம், பால்,அல்லது எளிமையான உணவுகளை சற்றே குறைவாக உண்டுவிட்டு சற்று நேரம் காலார நடந்துவிட்டு அதன் பிறகு படுத்தல் நிம்மதியான தூக்கத்துக்கும் ஆரோக்கியத்துக்கும் நல்லது.

”தலைவாழை இலை போட்டு விருந்து வைத்தேன் தலைவா உன் வருகைக்கு தவமிருந்தேன் ” என்னும் பாடல் நினைவுக்கு வருகிறது நம் முன்னோர்கள் தலைவாழை இலையை சுத்தமான நீரினால் கழுவி அந்த இலையின் நுனிப்பக்கம் உணவு உண்ண உட்கார்ந்திருப்பவரின் இடது கைக்கு நேரே இலையின் நுனிப்பக்கமும், வலது கைக்கு நேரே இலையின் விரிந்த பகுதியும் வருமாறு இலையைப் போடுவர்.

இதற்கு முக்கியமான காரணம் பெரும்பான்மையோர் வலது கையால் உண்ணும் பழக்கம் உள்ளவர்கள். அது மட்டுமல்லாது நம் கைக்கு வாகாக இலையின் நுனிப்பக்கம் சர்க்கரை கலந்த வாழைப்பழமும், தொட்டுக்கொள்ளும் ஊறுகாய் போன்றவைகளையும் பறிமாறுவர். இலையின் விரிந்த பக்கத்தில் காய்கறிகள், கூட்டு வகைகள், பச்சடி வகைகளைப் பறிமாறுவர்.

பொறித்த அப்பளம் வற்றல், வறுவல் போன்றவைகளை இரு பிரிவாக இருக்கும் இலையில் நம்பக்கமாக பறிமாறுவர். நம் முன்னோர்கள் இலையை தரையில் விரித்து உணவு வகைகளைப் பறிமாறிவிட்டு மணைப்பலகை போட்டு அதில் உட்கார்ந்து உண்ணுவர். இதன் ப்ரதான காரணம் நம் வயிறு கொள்ளும் அளவு நாம் குனிந்து உண்ணும் போது சரியான அளவைக் கொள்ளும்.

அதேபோல நீர் அருந்தும் போது நம் உதடுகள் பாத்திரத்தில் படாதவாறு மேலே தூக்கி கழுத்தைப் பின்பக்கமாக சாய்த்து அருந்துவர். கழுத்தை பின்பக்கமாக சாய்த்து நாம் நீர் அருந்தும்போது உணவுக் குழல் மடங்காமல் சீராக நீரை உள்ளே அனுப்பும் வகையில் சமனமாக தடையில்லாமல் இருக்கும். தலைவாழை இலயைப் போட்டு அந்த இலையைச் சுற்றிலும் நீரால் வட்டம் போடும் பழக்கம் இருந்தது

இதற்கு என்ன காரணம் என்றால் தரையில் ஊறும் பூச்சிகள் இலைக்கு வராமல் தடுக்கவே இந்த நீர்வட்டம். அதன் பிறகு இலையில் சூடான அன்னத்தைப் பரிமாறுவர். அந்த சாதத்தின் மேல் நெய்யை சிறிதளவு சேர்ப்பர். உண்ணத் தொடங்கும் போது நம் முன்னோர் அந்த அன்னத்தை நெய்யுடன் கலந்து சற்றே குறைவான அன்னத்தை வாயில் படாமல் நேரிடையாக உணவுக் குழல் மூலமாக இரைப்பைக்குள் அனுப்புவர்.

இந்த நெய்யுடன் கலந்த அன்னம் நம் தொண்டைக் குழாயை சுத்தம் செய்து வழுவழுப்பாக அன்னம் தடையின்றி உள்ளே செல்லத் தக்கதாக மாற்றும். ஆமாம் நம் உடலும் இயந்திரமே அவ்வப்போது இது போன்ற (Lubrication) எண்ணையிடுதல் தேவைப்படுகிறது. அதன் பிறகு அன்னத்தை நன்றாக நொறுக்கிப் பிசைந்து அந்த அன்னத்தின் நடுவில் சற்றே குழிவாக ஆக்கி குழம்பை ஊற்றிக்கொள்வர். குழம்பு இலையைவிட்டு ஓடாமல் இருக்க இந்த அமைப்பு உதவும்.சிறிது சிறிதாக அன்னத்தை அந்தக் குழம்புடன் கலந்து கவலம் கவளமாக உண்பர்.

அவ்வப்போது கறி ,கூட்டு இவைகளைக் கலந்து ருசியான உணவாக மாற்றி உண்பர். ’நொறுங்கத் தின்றால் நூறு வயது ” என்றொரு சொல்வழக்கு உண்டு. வாயில் அன்னத்தை இட்டு பற்களால் நன்றாகக் கடித்து நொறுக்கும் போது நாவிலிருந்து சுரக்கும் உமிழ்நீருடன் கலந்து நன்றாக அறைபட்டு உணவு இரைப்பைக்கு செல்லும்போது ,மீண்டும் உணவை அரைக்கும் இயந்திரமான இரைப்பைக் எந்தவித கடினமும் இல்லாமல் இப்படி உணவை அரைத்து உண்பதால் இரைப்பை நெடுங்காலம் சீராக வேலைசெய்ய தடையில்லாமல் இருக்கும் என்பதே நோக்கம்.

என்று நம் ஆன்றோர்கள் மிக அழகாக திட்டமிட்டு அறுசுவையையும் சேர்த்து அளித்தனர். சாதாரணமாக நாம் உண்ணும் உணவில் நம்முடைய பெரியவர்கள் எல்லாவித மருந்துகளையும் , அதாவது இயற்கையாக நமக்கு நோய் எதிர்ப்பு சக்திகள் அளிக்கக்கூடிய அத்துணை காய் கறிகள்,பழங்கள்,இலைகள், அனைத்தையும் நம் உணவோடு இரண்டற கலந்து அவைகளையே உண்டு வந்தனர் .

தலை வாழை இலையில் உணவு உண்ணும்போது அதில் பறிமாறப்படும் சூடான சாதம், காய்கறிகள்,கூட்டுகள், ஆகிய உணவு வகைகள் இயற்கையாகவே தங்களுடைய சூட்டினால் வாழை இலையில் இருக்கும் வாழைச் சாறை க்ரகித்துக் கொண்டு அதுவே நமக்கு நாம் சாப்பிடும் உணவுப் பொருட்களில் இருக்கும் விஷத்தன்மையை நீக்கிவிடும் மற்றும் நம்முடைய உணவு வகைகளில் நமக்குத் தேவையான அத்துணை சக்தியையும் அளிக்குமாறு சமைத்தனர்.

1.பொங்கலில் பாசிப்பருப்பு குளிர்ச்சியையும், நெய் கொழுப்பையும் அரிசி மாவின் ஊட்டச் சத்தையும், அளிக்கும்,அவைகள் நமக்குத் தேவையான புரதச் சத்துக்களை அளிக்க வல்லவை ஆனால் மிகைப்பாடாக நம் உடலில் சேரும் கொழுப்பு போன்றவைகளைக் கரைக்க அந்த உணவிலேயே இஞ்ஜி, மிளகு, கருவேப்பிலை போன்றவற்றை அதில் போட்டு நம் புரதச் சத்துக்களை நமக்குத் தேவையான அளவுக்கு கிடைக்கும்படி செய்தனர்.

2. அனைத்துக் காய்கறிகளையும் போட்டு செய்யும் கூட்டுகளில் நமக்குத்தேவையான அத்துணை புரதச் சத்துக்களும் கிடைக்கும்.

3.குழம்பு,அல்லது சாம்பார் என்று சொல்லப்படும் வகைகளில் மிளகு,சீரகம் வெந்தயம்,போன்றவை கலக்கப் படுவதால் அவைகளும் நமக்கு நல்லதே செய்யும்.

4.ரசம்என்று எடுத்துக் கொண்டால் ,அதில் பலவகை ரசங்கள் உள்ளன, மிளகு ரசம் ,வேப்பம்பூ ரசம், தேசாவர ரசம், சீரகரசம் ,திப்பிலி ரசம் ,பூண்டு ரசம், போன்றவை நமக்கு உணவாகவும் மருந்தாகவும் பயன்படுகின்றன.

அதேபோல் நம் காய் கறிகளில், ,வாழைத்தண்டு,வாழைப்பூ போன்றவை மருந்தாகவே உபயோகமாகிறது.வாழை மரப் பட்டையிலிருந்து எடுக்கப் படும் சாறு பாம்புக்கடிக்கும் மருந்தாக உபயோகப்பட்டிருக்கிறது.பாம்புக்கடிக்கு வைத்தியம் செய்ய முன்பெல்லாம் பாம்புக்கடி பட்டவரை வாழைப்பட்டையில் படுக்கவைத்து,வாயில் வாழைச் சாற்றை செலுத்துவர்.

மரம் செடி கொடிகளிலிருந்துதான் அனைத்து மருந்துகளும் மூலிகை என்னும் பெயரில் கண்டு பிடிக்கப்பட்டன. மரம் என்னும் வார்த்தையிலிருந்து மருந்து என்னும் சொல் ஏற்பட்டிருக்கலாம். வேப்பிலையை மஞ்சளுடன் அரைத்து தோல்வியாதிகளைத் தீர்ப்பர். வில்வ இலையை பலவிதமான நோய்களுக்கு மருந்தாக உபயோகித்தனர்.

துளசி இலையை தேனில் அரைத்துக் கொடுத்து கபம் ,சளி போன்றவைகளுக்கு மருந்தாக உபயோகித்தனர். அதேபோல சர்ப்பகந்தி என்னும் செடி பாம்புக்கடிக்கு மருந்தாகப் பயன்படுத்தி இருக்கிறார்கள் சுக்கு மிளகு, சீரகம்,கருவேப்பிலை, கடுகு,வெந்தயம், பெருங்காயம், உளுந்து,கடலைப் பருப்பு, துவரம் பருப்பு, பாசிப்பருப்பு, போன்றவைகளும் , வாழைக்காய், அவரைக்காய், வாழைத் தண்டு,வாழைப்பழம், மாம்பழம், பலாப்பழம், போன்ற பழ வகைகளும் உபயோகித்தனர்.

அதி மதுரம் என்னும் ஒரு மரப்பட்டை தொண்டைப் புண் போன்றவைகளை குணப்படுத்தும் மூலிகை,மற்றும் தூதுவளை போன்ற செடியின் இலைகள்,

வேப்பிலை,மஞ்ஜள், இவைகளை அரைத்து உஷ்ணத்தால் ஏற்படும் தோல் வியாதிகளுக்கும் பயன் படுத்தி வெற்றி கண்டிருக்கிறார்கள் கொழுந்து வேப்பிலையை அறைத்துக் கொடுத்து குழந்தைகளின் வயிற்றில் இருக்கும் தேவை இல்லாத பூச்சிகளைக் கொன்று ஆரோக்கியத்தை மீட்டிருக்கிறார்கள்.

அதுவும் தவிர பண்டிகைக் காலங்களில் நமக்குத்தேவையான அளவைவிட அதிகமாக நம் உடலில் சேரும் தேவை இல்லாத கொழுப்புகள்,போன்றவற்றைக் கரைக்க உபவாசங்கள், பத்திய உணவு வகைகள், தகுந்த காலத்தில் எள்ளிலிருந்து எடுக்கும் நல்லெண்ணைக் குளியல், போன்றவற்றைக் கண்டு பிடித்து, நம் உடல் ஆரோக்கியத்தை சமநிலையாக வைத்திருந்தார்கள்.

மிக முக்கியமாக நாம் உணவு உண்ணும்போது நம் கவனம் உணவில் மட்டுமே இருக்கவேண்டும்.தொலைக் காட்சி நிகழ்ச்சிகள் பார்த்துக்கொண்டே உண்ணுவது, நடந்து கொண்டே உண்ணுவது.மேசையின் மீது அமர்ந்து உண்ணுவது போன்றவை நிச்சயமாக தீமையைத்தான் செய்யும்.

காலப்போக்கில், நாம் அனைத்தையும் மறந்து விட்டு வைத்தியரிடம் ஓடிக்கொண்டிருக்கிறோம். மறந்தும் வைத்தியரிடம் போகாமல் மரம் செடி கொடிகளில் கிடைக்கும் உணவை உண்டு ஆரோக்கியம் காப்போம். நம் உடலில் எதையும் மிகவிடாமலும் , குறையவிடாமலும் சமநிலையில் நம்மை வைத்திருக்க. உதவும் காரணிகளை நம் முன்னோர் உணவு வகைகளிலேயே வைத்திருந்தனர்.

“மறைவாக நமக்குள்ளே பழங் கதைகள்

சொல்வதிலோர் மகிமை இல்லை;

திறமான புலமையெனில் வெளி நாட்டோர்

அதைவணக்கஞ் செய்தல் வேண்டும்." - மாகவி பாரதியார்

என்று பாரதியார் சொன்னதன் பொருள் நம்மிடம் இருக்கும் திறமைகளை அயல்நாட்டாரும் மதிக்கும் வண்ணம் அவைகளை நாம் முறைப்படுத்த வேண்டும் என்பதே. ஆனால் நாம் அதைத் தவறாக அர்த்தம் கற்பித்துக் கொள்கிறோம். அயல்நாட்டார் மதித்தால்தான் நாமும் மதிக்க வேண்டுமென்று அவசியமில்லை.

நமக்கு எப்போதுமே நம் நாட்டவர் சொன்னால் மதிக்காத குணமும் ,அதையே வெளிநாட்டவர் சொன்னால் மதிக்கும் குணமும் உண்டு.

ஒரு பழமொழி உண்டு ”தோட்டத்துப் பச்சிலை மூலிகையாகாது’ என்று நம் தோட்டத்தில் இருப்பதே தகுதிக் குறைவாய்ப் போகிறது. நம் தோட்டத்தில் இருக்கும் பச்சிலையை எதேச்சையாக பார்த்த வெளி நாட்டார் சொன்னால் உடனே அந்தப் பச்சிலைக்கு வேலி போடுவது நம் வழக்கம்.

மஞ்சள் நம் முன்னோர்களால் கண்டு பிடிக்கப்பட்ட கிருமி நாசினி, இங்கு அதை நாம் அதை உபயோகிக்கிறோமே தவிர ,அதைப் பெரிதாக எடுத்துக் கொண்டு ஆராய்வதில்லை ஆனால் அமெரிக்கா அதற்கு உரிமை கொண்டாடினால் மட்டும் நமக்கு கோவம் வரும், அப்போதுதான் அந்த மஞ்சளின் மகிமையே நமக்கு தெரியும். விஞ்ஞானம் என்று சொன்னால் புரியாதே என்று நம் முன்னோர்கள் அக்காலத்தில் மெய்ஞானம் என்றும் , மூலிகை வைத்தியம் என்று சொல்லிச் சென்றார்கள்.

நாக்கிற்கு சுவையூட்டக்கூடிய சமையல் எதுவாயினும் அவை எல்லாமே வயிற்றுக்கும்,நம் உடலுக்கும் ஏற்றதாக இருக்கும் என்று சொல்லிவிடமுடியாது. அப்படி அஜீரணம் அல்லது ஒவ்வாமை என்னும் நிலை வந்து அவதிப்படாமல் இருக்க ஒரு வழி சொல்லுகிறேன்.

இதுவும் முக்கியமாக சமையல் குறிப்பில் சேர்க்கப்படவேண்டியதே. மற்றும் நம்முடைய உணவு வகைகளில் நமக்குத் தேவையான அத்துணை சக்தியையும் அளிக்குமாறு சமைத்தனர் .

பண்டிகைக் காலங்களில் நமக்குத்தேவையான அளவைவிட அதிகமாக நம் உடலில் சேரும் தேவையில்லாத கொழுப்புகள், போன்றவற்றைக் கரைக்க உபவாசங்கள்,பத்திய உணவு வகைகள், தகுந்த காலத்தில் எள்ளிலிருந்து எடுக்கும் நல்லெண்ணைக் குளியல், போன்றவற்றைக் கண்டு பிடித்து, நம் உடல் ஆரோக்கியத்தை சமநிலையாக வைத்திருந்தார்கள்.

காலப்போக்கில், நாம் அனைத்தையும் மறந்து விட்டு வைத்தியரிடம் ஓடிக்கொண்டிருக்கிறோம். மறந்தும் வைத்தியரிடம் போகாமல் மரம் செடி கொடிகளில் கிடைக்கும் உணவை உண்டு ஆரோக்கியம் காப்போம் நம் முன்னோர்கள் விக்ஞானம் என்று சொன்னால் புரியாத அக்காலத்திலேயே மெய்ஞானம் என்றும் ,மூலிகை வைத்தியம்,பத்தியம், உண்ணா நோன்பு என்றும் பலவகைகள் ஏற்படுத்தி சென்றிருக்கிறார்கள்.

நமக்கெல்லாம் சில சமையம் நாம் உண்ணும் உணவுப் பொருட்கள் ஒவ்வாமையினாலோ, அல்லது அதிகமாக உண்டதாலோ ஜீரணம் ஆகாமல் அஜீரணத்தாலேயோ காய்ச்சல் வரும். அப்பிடிக் காய்ச்சல் வந்தால் ஒரு வேளை வயிற்றை காயப் போடு நிறைய தண்ணீர் குடி என்று பெரியவர்கள் சொல்லுவர்.

அதுதான் ”லங்கணம் பரம ஔஷதம்” லங்கணம் அப்பிடீன்னா வெறும் வயிறு, ஒன்றும் சாப்பிடாமல் வயிற்றைக் காலியாக வைத்திருத்தல் அப்பிடின்னு பொருள். பரம ஔஷதம் அப்பிடீன்னா நல்ல மருந்து என்று பொருள். மாசத்துக்கு ஒரு வேளை உண்ணாமல் இருந்து வயிற்றுக்கு உணவை செரிக்கிற ஜீரண உறுப்புகளுக்கு சற்றே ஓய்வு கொடுத்தால் காய்ச்சல் சரியாயிடும்னு சொல்லுவாங்க. இதை மனதில் வைத்துக்கொண்டுதான் பெரியவங்க நமக்கு ஒரு சரியான வழியைக் காட்டியிருக்கிறார்கள்.

அது என்ன தெரியுமா ”விரதம்” . உண்ணா விரதம் . மாத்த்தில் ஒரு நாள் எதுவும் உண்ணமல் விரதம் இருப்பது. அதை ஒட்டியே சிவராத்திரி அன்று ,சூரிய கிரகணம் சந்திர கிரகணம், ஏகாதசி, வைகுண்ட ஏகாதசி,பௌர்ணமி, அமாவாசை இப்பிடி ஒவ்வொரு மாதத்துக்கும் எப்பிடியாவது ஒருநாள் எதுவும் உண்ணாமல் இருந்துட்டு மறுநாள் நல்ல சாப்பாடு சாப்படலாம்,இப்பிடி மாத்த்துக்கு ஒருநாள் உண்ணாமல் இருந்தால் நமக்கு வரும் நோய்களிலிருந்து ஓரளவு தப்பிக்கலாம் .

அப்பிடி விரதம் இருக்கும் போது மனதைக் கட்டுப்படுத்தி ஒரு மாசம் முழுவதும் நமக்கு உணவு அளித்த இறைவனுக்கு நன்றி கூறும் விதமாக அந்த நேரத்தில் நமக்குத் தெரிஞ்ச நல்ல ஸ்லோகங்களை உச்சரித்தால் மனமும் உடலும் ஒருமைப்படும் .

சரியான வழிமுறைகளைக் கடைப்பிடித்தால் உணவே மருந்தாகும்

இல்லையெனில் உணவே ஒவ்வாது.

அன்புடன்

தமிழ்த்தேனீ

2011-07-09T23:16:00.000+05:30

தமிழ்த்தேனீ @ தமிழ் நண்பர்கள்